ಜಿಮ್‌ನಲ್ಲಿ ಭೇಟಿ, ಸಾಫ್ಟ್‌ವೇರ್‌ ಕಂಪನಿ ಕೆಲಸ: 7,500 ರೂ. ಸಂಬಳ ಪಡೆಯುತ್ತಿದ್ದ ಅಶ್ವಿನಿ ಅಪ್ಪು ಮನಗೆದ್ದಿದ್ದು ಹೇಗೆ? | Puneeth Rajkumar Love Story Ashwini Worked in Software Company HR and Marketing Before Meeting Appu

Entertainment

oi-Manohara M

ಕನ್ನಡ ಚಿತ್ರರಂಗದ ಧ್ರುವತಾರೆ, ಕೋಟಿ ಕನ್ನಡಿಗರ ನೆಚ್ಚಿನ ಪುನೀತ್ ರಾಜ್‌ಕುಮಾರ್ (ಅಪ್ಪು) ಅವರ ಸರಳತೆ ಮತ್ತು ವ್ಯಕ್ತಿತ್ವದ ಬಗ್ಗೆ ನಮಗೆಲ್ಲಾ ತಿಳಿದಿದೆ. ಆದರೆ, ಅವರ ವೈಯಕ್ತಿಕ ಬದುಕಿನ ಅತ್ಯಂತ ಸುಂದರ ಅಧ್ಯಾಯವಾದ “ಪ್ರೇಮಕಥೆ”ಯ ಬಗ್ಗೆ ಅಷ್ಟಾಗಿ ಯಾರಿಗೂ ತಿಳಿದಿರಲಿಲ್ಲ. ಇತ್ತೀಚೆಗೆ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಅವರು ಅಪ್ಪು ಜೊತೆಗಿನ ತಮ್ಮ ಮೊದಲ ಭೇಟಿ, ಪ್ರೇಮ ನಿವೇದನೆ ಮತ್ತು ಮದುವೆಯವರೆಗಿನ ಆ ರೋಚಕ ಹಾದಿಯನ್ನು ಬಿಚ್ಚಿಟ್ಟಿದ್ದಾರೆ. ಆ ಮಧುರ ನೆನಪುಗಳ ಮೆಲುಕು ಇಲ್ಲಿದೆ.

ಅಶ್ವಿನಿ ಅವರ ಬಾಲ್ಯ ಮತ್ತು ಕುಟುಂಬ

ಅಶ್ವಿನಿ ಅವರ ತಂದೆ ರೇವನಾಥ್. ಕುಟುಂಬ ಮೂಲತಃ ಚಿಕ್ಕಮಗಳೂರು ಜಿಲ್ಲೆಯವರಾದರೂ, ಅಶ್ವಿನಿ ಅವರು ಜನಿಸಿದ್ದು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ. ಆದರೆ, ಅಲ್ಲಿ ಅವರು ಕಳೆದದ್ದು ಕೇವಲ ಮೂರು ವರ್ಷಗಳು ಮಾತ್ರ. ಅವರ ತಂದೆಯ ವೃತ್ತಿಜೀವನದ ಕಾರಣಕ್ಕಾಗಿ ಇಡೀ ಕುಟುಂಬ ಬೆಂಗಳೂರಿಗೆ ಶಿಫ್ಟ್ ಆಯಿತು. ಅಶ್ವಿನಿ ಅವರ ಬಾಲ್ಯದ ಬಹುಪಾಲು ದಿನಗಳು ಕಳೆದದ್ದು ಉದ್ಯಾನನಗರಿ ಬೆಂಗಳೂರಿನಲ್ಲೇ. ಅಶ್ವಿನಿ ಅವರ ಕುಟುಂಬ ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡಿತ್ತು. ಅವರ ತಾಯಿ ಮೈಸೂರಿನ ಪ್ರತಿಷ್ಠಿತ “ಮಾನಸಗಂಗೋತ್ರಿ” ವಿಶ್ವವಿದ್ಯಾಲಯದಲ್ಲಿ ಉಪನ್ಯಾಸಕಿಯಾಗಿ ಕೆಲಸ ಮಾಡುತ್ತಿದ್ದರು. ತಂದೆ ಬೆಂಗಳೂರಿನಲ್ಲಿ ಕೆಲಸದಲ್ಲಿದ್ದರು. ಅಶ್ವಿನಿ ಅವರು ತಮ್ಮ ಬಾಲ್ಯವನ್ನು “ಅತ್ಯಂತ ಸಂತೋಷದ ಮತ್ತು ಸಾಮಾನ್ಯ ದಿನಗಳು” ಎಂದು ನೆನಪಿಸಿಕೊಳ್ಳುತ್ತಾರೆ.

ಅಶ್ವಿನಿ ಅವರಿಗೆ ಇಬ್ಬರು ಒಡಹುಟ್ಟಿದವರಿದ್ದಾರೆ. ಅವರ ಸಹೋದರಿ ಪ್ರಸ್ತುತ ಆಸ್ಟ್ರೇಲಿಯಾದಲ್ಲಿ ನೆಲೆಸಿದ್ದಾರೆ. ಇವರ ಜೊತೆಗೆ ಒಬ್ಬ ಸಹೋದರ ಕೂಡ ಇದ್ದಾರೆ. ಅಶ್ವಿನಿ ಅವರ ತಾಯಿ ಕಡೆಯ ಊರು ಚಿಕ್ಕಮಗಳೂರು ಜಿಲ್ಲೆಯ ಕುಶಾವರ. ಬಾಲ್ಯದಲ್ಲಿ ಸ್ಕೂಲ್ ಮತ್ತು ಕಾಲೇಜು ರಜೆ ಬಂತೆಂದರೆ ಸಾಕು, ಅಶ್ವಿನಿ ಅವರಿಗೆ ಸಂಭ್ರಮವೋ ಸಂಭ್ರಮ. ಬೆಂಗಳೂರಿನ ಜಂಜಾಟದಿಂದ ದೂರವಾಗಿ ಮಲೆನಾಡಿನ ಈ ಸುಂದರ ಹಳ್ಳಿಗೆ ಹೋಗುವುದು ಅವರ ನೆಚ್ಚಿನ ಹವ್ಯಾಸವಾಗಿತ್ತು. ಇಂದಿಗೂ ಆ ಊರಿನ ನೆನಪುಗಳು ಅವರ ಮನದಲ್ಲಿ ಹಸಿರಾಗಿವೆ.

ಬಾಲ್ಯದ ರಜೆಗಳಲ್ಲಿ ಎಲ್ಲಾ ಸಹೋದರ-ಸಹೋದರಿಯರು ಕುಶಾವರದಲ್ಲಿ ಒಟ್ಟಿಗೆ ಸೇರುತ್ತಿದ್ದರು. ಎಲ್ಲರಿಗೂ ಒಂದೇ ಸಮಯದಲ್ಲಿ ರಜೆ ಸಿಗುತ್ತಿದ್ದರಿಂದ ಆ ದಿನಗಳು ಹಬ್ಬದಂತಿದ್ದವು. ವಿಶೇಷವೆಂದರೆ, ಬಾಲ್ಯದಲ್ಲಿ ಶುರುವಾದ ಆ ಸ್ನೇಹ ಇಂದಿಗೂ ಮುಂದುವರಿದಿದೆ. “ನಾವು ಎಲ್ಲಾ ಕಸಿನ್ಸ್ ಇಂದಿಗೂ ಸಂಪರ್ಕದಲ್ಲಿದ್ದೇವೆ. ಪ್ರತಿ ಮೂರು ತಿಂಗಳಿಗೊಮ್ಮೆ ಎಲ್ಲರೂ ಭೇಟಿಯಾಗುತ್ತೇವೆ ಮತ್ತು ಬಾಲ್ಯದ ನೆನಪುಗಳನ್ನು ಮೆಲುಕು ಹಾಕುತ್ತೇವೆ” ಎನ್ನುತ್ತಾರೆ ಅಶ್ವಿನಿ.

ಜಿಮ್‌ನಲ್ಲಿ ಶುರುವಾದ ಭೇಟಿ

ಅಶ್ವಿನಿ ಮತ್ತು ಪುನೀತ್ ಅವರ ಭೇಟಿಯಾಗಿದ್ದು ಒಂದು ಜಿಮ್‌ನಲ್ಲಿ. ಅಶ್ವಿನಿ ಅವರು ಜಿಮ್‌ಗೆ ಹೋಗುತ್ತಿದ್ದ ಸಮಯದಲ್ಲಿ ಪುನೀತ್ ಅವರು ಕೂಡ ಅಲ್ಲಿಗೆ ಬರುತ್ತಿದ್ದರು. “ಆಗ ಅಪ್ಪು ಬಹಳ ಸ್ಟೈಲಿಶ್ ಆಗಿ ಕಾಣಿಸುತ್ತಿದ್ದರು, ಉತ್ತಮವಾದ ಟೀ-ಶರ್ಟ್ ಧರಿಸಿ ಜಿಮ್‌ಗೆ ಬರುತ್ತಿದ್ದರು” ಎಂದು ಅಶ್ವಿನಿ ಅಂದಿನ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ. ನಟನ ಮಗ ಎಂಬ ಹಮ್ಮಿಲ್ಲದೆ ಅಪ್ಪು ತೋರಿಸುತ್ತಿದ್ದ ಸರಳತೆಯೇ ಅಶ್ವಿನಿ ಅವರ ಗಮನ ಸೆಳೆಯಲು ಕಾರಣವಾಯಿತು.

ಲ್ಯಾಂಡ್‌ಲೈನ್‌ ನಂಬರ್ ಕೇಳಿದ್ದ ಅಪ್ಪು

ಪುನೀತ್ ಅವರು ಒಂದು ದಿನ ಧೈರ್ಯ ಮಾಡಿ ಅಶ್ವಿನಿ ಅವರ ಲ್ಯಾಂಡ್‌ಲೈನ್‌ ನಂಬರ್ ಕೇಳಿಯೇ ಬಿಟ್ಟರಂತೆ. ಆದರೆ ಅಶ್ವಿನಿ ಅವರು ಅಷ್ಟು ಸುಲಭವಾಗಿ ನಂಬರ್ ನೀಡಲಿಲ್ಲ. “ನೀವು ನನಗೆ ಕರೆ ಮಾಡುವ ಅಗತ್ಯವಿಲ್ಲ” ಎಂದು ನೇರವಾಗಿಯೇ ಹೇಳಿದ್ದರಂತೆ. ಆದರೆ, ಹೇಗೋ ನಂಬರ್ ಪತ್ತೆ ಹಚ್ಚಿ ಪುನೀತ್ ಕರೆ ಮಾಡಿದಾಗ, ಅಶ್ವಿನಿ ಅವರು ಅಪ್ಪುವನ್ನು ಸತಾಯಿಸಲು “ಇದು ರಾಂಗ್ ನಂಬರ್” ಎಂದು ಹೇಳಿ ಫೋನ್ ಕಟ್ ಮಾಡುತ್ತಿದ್ದರಂತೆ! ಹೀಗೆಯೇ ಇಬ್ಬರ ನಡುವೆ ಸ್ನೇಹ ಚಿಗುರಿತು.

ಮೊದಲ ಸಂಬಳದಲ್ಲಿ ಅಪ್ಪುಗೆ ಸರ್‌ಪ್ರೈಸ್ ಗಿಫ್ಟ್

ಕಾಲೇಜು ಮುಗಿಸಿದ ನಂತರ ಅಶ್ವಿನಿ ಅವರು ಒಂದು ಸಾಫ್ಟ್‌ವೇರ್ ಕಂಪನಿಯಲ್ಲಿ ಕೆಲಸಕ್ಕೆ ಸೇರಿದರು. ಸುಮಾರು ಎರಡು ವರ್ಷಗಳ ಕಾಲ ಅಲ್ಲಿ ವೃತ್ತಿಜೀವನ ನಡೆಸಿದರು. ಅಶ್ವಿನಿ ಅವರಿಗೆ ಸಿಕ್ಕ ಮೊದಲ ಸಂಬಳ ಕೇವಲ 7,500 ರೂಪಾಯಿಗಳು. ಈ ಹಣದಲ್ಲಿ ಅವರು ತಮ್ಮ ತಾಯಿಗೆ ಒಂದು ಸುಂದರ ಸೀರೆ ಕೊಡಿಸಿದ್ದರು. ಅಷ್ಟೇ ಅಲ್ಲ, ಆಗಲೇ ಅಪ್ಪು ಜೊತೆ ಡೇಟಿಂಗ್ ಮಾಡುತ್ತಿದ್ದ ಅಶ್ವಿನಿ, ತನ್ನ ಪ್ರೀತಿಯ ಹುಡುಗನಿಗಾಗಿ ಮೊದಲ ಸಂಬಳದಲ್ಲಿ ಒಂದು ಬ್ರ್ಯಾಂಡೆಡ್ ‘ಸನ್ ಗ್ಲಾಸ್’ ಅನ್ನು ಉಡುಗೊರೆಯಾಗಿ ನೀಡಿದ್ದರು.

ಅಶ್ವಿನಿ ಅವರು ಬಾಲ್ಯದಲ್ಲಿ ಪುನೀತ್ ರಾಜ್‌ಕುಮಾರ್ ಅವರ ರಾಷ್ಟ್ರ ಪ್ರಶಸ್ತಿ ವಿಜೇತ ಚಿತ್ರ ‘ಬೆಟ್ಟದ ಹೂವು’ ನೋಡಿದ್ದರು. ಅಂದು ಆ ಸಿನಿಮಾದಲ್ಲಿ ರಾಮು ಎಂಬ ಬಾಲಕನನ್ನು ನೋಡಿ ಮೆಚ್ಚಿಕೊಂಡಿದ್ದ ಅಶ್ವಿನಿ, ಎಂದಾದರೂ ಒಂದು ದಿನ ಅದೇ ಹುಡುಗನನ್ನು ನಾನು ಮದುವೆಯಾಗುತ್ತೇನೆ ಎಂದು ಕನಸಿನಲ್ಲೂ ಅಂದುಕೊಂಡಿರಲಿಲ್ಲವಂತೆ. ವಿಧಿಯ ಆಟ ಚಿತ್ರದ ಬಾಲನಟನನ್ನು ಅಶ್ವಿನಿ ಅವರ ಜೀವನದ ನಾಯಕನನ್ನಾಗಿ ಮಾಡಿತ್ತು.

ಅಪ್ಪುವಿನ ಕೆಟ್ಟ ಹ್ಯಾಂಡ್‌ರೈಟಿಂಗ್

ಆ ಕಾಲದಲ್ಲಿ ಇಂದಿನಂತೆ ವಾಟ್ಸಾಪ್ ಇರಲಿಲ್ಲ. ಪ್ರೀತಿಯನ್ನು ವ್ಯಕ್ತಪಡಿಸಲು ಇದ್ದದ್ದು ಗ್ರೀಟಿಂಗ್ ಕಾರ್ಡ್‌ಗಳು ಮಾತ್ರ. ಪುನೀತ್ ಅವರು ಅಶ್ವಿನಿ ಅವರಿಗೆ ಪ್ರೀತಿಯಿಂದ ಕಾರ್ಡ್‌ಗಳನ್ನು ಬರೆಯುತ್ತಿದ್ದರು. ಆದರೆ ಇಲ್ಲಿ ಒಂದು ತಮಾಷೆಯ ವಿಷಯವಿದೆ. ಪುನೀತ್ ಅವರ ಕೈಬರಹ ಅದೆಷ್ಟು ಕೆಟ್ಟದಾಗಿತ್ತೆಂದರೆ, ಅವರು ಬರೆದದ್ದು ಅಶ್ವಿನಿ ಅವರಿಗೆ ಅರ್ಥವೇ ಆಗುತ್ತಿರಲಿಲ್ಲವಂತೆ, ಆಗ ಅದನ್ನು ಅವರಿಗೇ ಓದಲು ಹೇಳುತ್ತಿದ್ದರು ಅಶ್ವಿನಿ. ಇಬ್ಬರೂ ಮೊದಲ ಬಾರಿಗೆ ಭೇಟಿಯಾಗಲು ಆರಿಸಿಕೊಂಡ ಜಾಗ ಬೆಂಗಳೂರಿನ ಕನ್ನಿಂಗ್‌ಹ್ಯಾಮ್‌ ರೋಡ್‌ನಲ್ಲಿದ್ದ ಒಂದು ಕಾಫಿ ಶಾಪ್. ಅಲ್ಲಿಯೇ ಕುಳಿತು ತಮ್ಮ ಭವಿಷ್ಯದ ಬಗ್ಗೆ ಮಾತನಾಡಿಕೊಂಡ ಇಬ್ಬರು, ನಂತರ ಮನೆಯವರನ್ನು ಒಪ್ಪಿಸುವ ನಿರ್ಧಾರ ಮಾಡಿದರು.

ಅಮೆರಿಕದ ಸಂಬಂಧ ನಿರಾಕರಿಸಿ ಅಪ್ಪುಗಾಗಿ ಹಟ

ಪುನೀತ್ ರಾಜ್‌ಕುಮಾರ್ ಮತ್ತು ಅಶ್ವಿನಿ ಅವರ ದಾಂಪತ್ಯ ನಮಗೆಲ್ಲರಿಗೂ ಮಾದರಿ. ಆದರೆ, ಈ ಜೋಡಿ ಒಂದಾಗುವುದು ಅಷ್ಟು ಸುಲಭವಾಗಿರಲಿಲ್ಲ. ಇತ್ತೀಚೆಗೆ ಅಶ್ವಿನಿ ಅವರು ಬಿಚ್ಚಿಟ್ಟಿರುವ ಈ ಸತ್ಯ ಕಥೆ ಯಾವುದೇ ಸಿನಿಮಾ ಟ್ವಿಸ್ಟ್‌ಗೂ ಕಡಿಮೆ ಇಲ್ಲ. ಪ್ರೀತಿಗಾಗಿ ಅವರು ಮಾಡಿದ ಹೋರಾಟ ಮತ್ತು ಪಾರ್ವತಮ್ಮನವರು ತೋರಿದ ದೊಡ್ಡಗುಣವನ್ನು ಅವರೇ ಬಿಚ್ಚಿಟ್ಟಿದ್ದಾರೆ.

ಅಪ್ಪು ಜೊತೆ ಮದುವೆಗೆ ಮನೆಯವರು ಒಪ್ಪಲಿಲ್ಲ

ಅಶ್ವಿನಿ ಅವರ ತಂದೆಗೆ ಡಾ. ರಾಜ್‌ಕುಮಾರ್ ಕುಟುಂಬದ ಮೇಲೆ ಅಪಾರವಾದ ಗೌರವವಿತ್ತು. ಆದರೆ, ತಮ್ಮ ಮಗಳು ಚಿತ್ರರಂಗದ ಕುಟುಂಬಕ್ಕೆ ಸೊಸೆಯಾಗಿ ಹೋಗುವುದು ಅವರಿಗೆ ಇಷ್ಟವಿರಲಿಲ್ಲ. ಸಿನಿಮಾ ರಂಗದ ಬದುಕು ಮತ್ತು ಸಾಮಾನ್ಯ ಕುಟುಂಬದ ಬದುಕಿನ ನಡುವಿನ ವ್ಯತ್ಯಾಸ ಅವರನ್ನು ಆತಂಕಕ್ಕೀಡು ಮಾಡಿತ್ತು. ಹೀಗಾಗಿ, ಪುನೀತ್ ಮತ್ತು ಅಶ್ವಿನಿ ಅವರ ಪ್ರೀತಿಯ ವಿಷಯ ತಿಳಿದಾಗ ಮನೆಯಲ್ಲಿ ತೀವ್ರ ವಿರೋಧವೂ ವ್ಯಕ್ತವಾಗಿತ್ತು. ಮಗಳ ಮನಸ್ಸು ಬದಲಾಯಿಸಲು ಅಶ್ವಿನಿ ಅವರ ಮನೆಯಲ್ಲಿ ಅಮೆರಿಕದಲ್ಲಿ ನೆಲೆಸಿದ್ದ ಸಾಫ್ಟ್‌ವೇರ್ ಎಂಜಿನಿಯರ್ ಒಬ್ಬರ ಸಂಬಂಧವನ್ನು ತಂದಿದ್ದರು. ಆದರೆ, ಅಶ್ವಿನಿ ಅವರ ಮನದಲ್ಲಿ ಅಪ್ಪು ಇದ್ದಿದ್ದರಿಂದ ಎಷ್ಟೇ ಒತ್ತಡ ಬಂದರೂ ಅಶ್ವಿನಿ ಅವರು ಅಪ್ಪುವಿನ ಮೇಲಿನ ಪ್ರೀತಿಗಾಗಿ ಅಮೆರಿಕದ ಆ ಸಂಬಂಧವನ್ನು ತಿರಸ್ಕರಿಸಿದರು.

ಯಾವಾಗ ಅಶ್ವಿನಿ ತಮ್ಮ ನಿರ್ಧಾರದಲ್ಲಿ ಅಚಲವಾಗಿದ್ದರೋ, ಆಗ ರಾಜ್‌ಕುಮಾರ್ ಪತ್ನಿ ಪಾರ್ವತಮ್ಮ ಅವರು ತಾವೇ ಖುದ್ದಾಗಿ ತಮ್ಮ ಕುಟುಂಬದವರ ಜೊತೆ ಅಶ್ವಿನಿ ಅವರ ಮನೆಗೆ ಭೇಟಿ ನೀಡಿದರು. ಅಶ್ವಿನಿ ಅವರ ಮನೆಯಲ್ಲಿ ಪಾರ್ವತಮ್ಮನವರು ಅಂದು ಆಡಿದ ಮಾತುಗಳು ಪೋಷಕರ ಮನ ಗೆದ್ದವು. ಅಂದೇ ಆ ಕ್ಷಣದಲ್ಲೇ ಅಶ್ವಿನಿ ಅವರಿಗೆ ಹೂ ಮುಡಿಸುವ ಶಾಸ್ತ್ರ ಮಾಡಲಾಯಿತು. “ಅಪ್ಪು ಜೊತೆ ಇವಳ ಮದುವೆ ಮಾಡುವುದು ನಮ್ಮ ಜವಾಬ್ದಾರಿ” ಎಂದು ಮಾತು ಕೊಟ್ಟು ಪಾರ್ವತಮ್ಮನವರು ಬೆಂಗಳೂರಿಗೆ ಮರಳಿದರು. ಅತ್ತೆ ಪಾರ್ವತಮ್ಮನವರ ಹಸ್ತಕ್ಷೇಪದ ನಂತರ ಎಲ್ಲ ಅಡೆತಡೆಗಳು ನಿವಾರಣೆಯಾದವು. ಡಿಸೆಂಬರ್ 1, 1999ರಂದು ಅಶ್ವಿನಿ ಅವರು ಅಣ್ಣಾವ್ರ ಮನೆಯ ಕಿರಿಯ ಸೊಸೆಯಾಗಿ ಗೃಹಪ್ರವೇಶ ಮಾಡಿದರು.

ಮದುವೆಗೆ ಸಾಕ್ಷಿಯಾದ 48,000 ಜನ

ಮನೆಯವರ ಒಪ್ಪಿಗೆ ಪಡೆದ ನಂತರ ಮದುವೆಯ ಶಾಸ್ತ್ರಗಳು ಶುರುವಾದವು. ಅಶ್ವಿನಿ ಅವರು ನೆನಪಿಸಿಕೊಳ್ಳುವಂತೆ, ಮೊದಲ ಬಾರಿಗೆ ಪುನೀತ್ ಅವರ ಕುಟುಂಬದವರು ಹೆಣ್ಣು ನೋಡಲು ಬಂದಾಗ, ಶಾಸ್ತ್ರಕ್ಕೆ ಹೂವು ಮುಡಿಯಲು ಅವರು ಪಟ್ಟ ಪಾಡು ಅಷ್ಟಿಷ್ಟಲ್ಲವಂತೆ. ಕೊನೆಗೆ 1999ರ ಡಿಸೆಂಬರ್ 1ರಂದು ಇಬ್ಬರೂ ವಿವಾಹವಾದರು. ಈ ಮದುವೆಗೆ ಸಾಕ್ಷಿಯಾಗಿದ್ದು ಬರೋಬ್ಬರಿ 48,000 ಜನ. ಅರಮನೆ ಮೈದಾನದಲ್ಲಿ ನಡೆದ ಈ ಮದುವೆ ಇಂದಿಗೂ ಕನ್ನಡ ಚಿತ್ರರಂಗದ ಮರೆಯಲಾಗದ ಸಂಭ್ರಮಗಳಲ್ಲಿ ಒಂದು. ಅಶ್ವಿನಿ ಮತ್ತು ಪುನೀತ್ ರಾಜ್‌ಕುಮಾರ್ ಅವರ ಪ್ರೇಮಕಥೆ ಯಾವ ಸಿನಿಮಾಗೂ ಕಡಿಮೆ ಇಲ್ಲ.

ದಾಂಪತ್ಯ ಜೀವನ

ಅಶ್ವಿನಿ-ಪುನೀತ್ ಬೆಂಗಳೂರಿನಲ್ಲಿ ಅದ್ಧೂರಿಯಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಈ ಸುಂದರ ದಂಪತಿಗೆ ದೃತಿ ಮತ್ತು ವಂದಿತಾ ಎಂಬ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಪುನೀತ್ ಅವರು ಕೇವಲ ಪತಿಯಾಗಿ ಮಾತ್ರವಲ್ಲದೆ, ಅಶ್ವಿನಿ ಅವರಿಗೆ ಸದಾ ಬೆನ್ನೆಲುಬಾಗಿ ನಿಂತಿದ್ದರು. ಅಶ್ವಿನಿ ಅವರಲ್ಲಿನ ಪ್ರತಿಭೆಯನ್ನು ಗುರುತಿಸಿ ಅವರನ್ನು ನಿರ್ಮಾಪಕಿಯಾಗಿ ಸ್ಯಾಂಡಲ್‌ವುಡ್‌ಗೆ ಪರಿಚಯಿಸಿದ್ದೇ ಅಪ್ಪು. ‘ಪಿಆರ್‌ಕೆ ಪ್ರೊಡಕ್ಷನ್’ (PRK Productions) ಜವಾಬ್ದಾರಿಯನ್ನು ಅಶ್ವಿನಿ ಅವರಿಗೆ ನೀಡಿ, ಹೊಸ ಪ್ರತಿಭೆಗಳಿಗೆ ವೇದಿಕೆ ಕಲ್ಪಿಸಿಕೊಡುವ ಕನಸು ಕಂಡಿದ್ದರು. ದುರದೃಷ್ಟವಶಾತ್, ಪುನೀತ್ ರಾಜ್‌ಕುಮಾರ್ ಅವರು 2021ರ ಅಕ್ಟೋಬರ್ 29ರಂದು ತೀವ್ರ ಹೃದಯಾಘಾತದಿಂದ ನಿಧನರಾದರು. ಇದು ಇಡೀ ಕರ್ನಾಟಕಕ್ಕೆ ತುಂಬಲಾರದ ನಷ್ಟವಾಯಿತು. ಅಪ್ಪು ದೈಹಿಕವಾಗಿ ದೂರವಾದರೂ, ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಅವರು ಪ್ರಸ್ತುತ ಪಿಆರ್‌ಕೆ ಪ್ರೊಡಕ್ಷನ್ ಮೂಲಕ ತಮ್ಮ ಪತಿಯ ಸಿನಿಮಾ ಕನಸುಗಳನ್ನು ನನಸು ಮಾಡುತ್ತಾ, ಧೈರ್ಯದಿಂದ ಮುನ್ನಡೆಯುತ್ತಿದ್ದಾರೆ.

==

ಅಶ್ವಿನಿ ಮತ್ತು ಪುನೀತ್ ರಾಜ್‌ಕುಮಾರ್ ಅವರ ಕುರಿತು ಪ್ರಶ್ನೋತ್ತರಗಳು (FAQs)

1. ಅಶ್ವಿನಿ ಮತ್ತು ಪುನೀತ್ ರಾಜ್‌ಕುಮಾರ್ ಅವರು ಮೊದಲು ಭೇಟಿಯಾಗಿದ್ದು ಎಲ್ಲಿ?

ಅಶ್ವಿನಿ ಮತ್ತು ಪುನೀತ್ ಅವರು ಮೊದಲ ಬಾರಿಗೆ ಬೆಂಗಳೂರಿನ ಒಂದು ಜಿಮ್‌ನಲ್ಲಿ ಭೇಟಿಯಾದರು. ಅಲ್ಲಿ ಇಬ್ಬರೂ ವ್ಯಾಯಾಮ ಮಾಡಲು ಬರುತ್ತಿದ್ದಾಗ ಸ್ನೇಹ ಆರಂಭವಾಯಿತು.

2. ಅಶ್ವಿನಿ ಅವರು ಪುನೀತ್ ಅವರ ಲ್ಯಾಂಡ್‌ಲೈನ್ ನಂಬರ್ ಕೇಳಿದಾಗ ಏನು ಮಾಡಿದ್ದರು?

ಪುನೀತ್ ಅವರು ನಂಬರ್ ಕೇಳಿದಾಗ ಅಶ್ವಿನಿ ಅವರು ಮೊದಲು ನಿರಾಕರಿಸಿದ್ದರು. ನಂತರ ಹೇಗೋ ನಂಬರ್ ಪಡೆದು ಪುನೀತ್ ಕರೆ ಮಾಡಿದಾಗ, ಅಶ್ವಿನಿ ಅವರು ಅಪ್ಪುವನ್ನು ಸತಾಯಿಸಲು “ಇದು ರಾಂಗ್ ನಂಬರ್” ಎಂದು ಹೇಳಿ ಫೋನ್ ಕಟ್ ಮಾಡುತ್ತಿದ್ದರು.

3. ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಅವರ ಹುಟ್ಟೂರು ಯಾವುದು?

ಅಶ್ವಿನಿ ಅವರು ಜನಿಸಿದ್ದು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ. ಆದರೆ ಅವರ ಕುಟುಂಬದ ಬೇರುಗಳು ಚಿಕ್ಕಮಗಳೂರು ಜಿಲ್ಲೆಯ ಕುಶಾವರ ಎಂಬ ಹಳ್ಳಿಯಲ್ಲಿವೆ.

4. ಅಶ್ವಿನಿ ಅವರ ವೃತ್ತಿಜೀವನ ಮತ್ತು ಮೊದಲ ಸಂಬಳ ಎಷ್ಟಿತ್ತು?

ಅಶ್ವಿನಿ ಅವರು ಕಾಲೇಜು ಮುಗಿದ ನಂತರ ಎರಡು ವರ್ಷಗಳ ಕಾಲ ಸಾಫ್ಟ್‌ವೇರ್ ಕಂಪನಿಯಲ್ಲಿ ಕೆಲಸ ಮಾಡಿದ್ದರು. ಅವರ ಮೊದಲ ಸಂಬಳ 7,500 ರೂಪಾಯಿ ಆಗಿತ್ತು.

5. ಮೊದಲ ಸಂಬಳದಲ್ಲಿ ಅಶ್ವಿನಿ ಅವರು ಅಪ್ಪುಗೆ ನೀಡಿದ ಉಡುಗೊರೆ ಯಾವುದು?

ತಮ್ಮ ಮೊದಲ ಸಂಬಳದಲ್ಲಿ ಅಶ್ವಿನಿ ಅವರು ತಾಯಿಗೆ ಸೀರೆ ಕೊಡಿಸಿದ್ದರು ಮತ್ತು ಅಪ್ಪು ಅವರಿಗೆ ಬ್ರ್ಯಾಂಡೆಡ್ ‘ಸನ್ ಗ್ಲಾಸ್’ (ಕನ್ನಡಕ) ಅನ್ನು ಉಡುಗೊರೆಯಾಗಿ ನೀಡಿದ್ದರು.

6. ಅಶ್ವಿನಿ ಅವರ ಮನೆಯವರು ಮೊದಲು ಈ ಮದುವೆಗೆ ಯಾಕೆ ಒಪ್ಪಿರಲಿಲ್ಲ?

ಅಶ್ವಿನಿ ಅವರ ತಂದೆಗೆ ರಾಜ್‌ಕುಮಾರ್ ಕುಟುಂಬದ ಮೇಲೆ ಗೌರವವಿತ್ತು. ಆದರೆ, ಚಿತ್ರರಂಗದ ಜೀವನ ಶೈಲಿಗೂ ತಮ್ಮ ಸಾಮಾನ್ಯ ಕುಟುಂಬಕ್ಕೂ ಹೊಂದಾಣಿಕೆಯಾಗುತ್ತದೆಯೇ ಎಂಬ ಆತಂಕದಿಂದ ಅವರು ಮೊದಲು ಮದುವೆಗೆ ವಿರೋಧ ವ್ಯಕ್ತಪಡಿಸಿದ್ದರು.

7. ಮದುವೆ ನಿರಾಕರಿಸಲು ಅಶ್ವಿನಿ ಅವರ ಮುಂದೆ ಬಂದಿದ್ದ ಮತ್ತೊಂದು ಪ್ರಸ್ತಾವನೆ ಯಾವುದು?

ಅಪ್ಪುವನ್ನು ಮರೆಯುವಂತೆ ಮಾಡಲು ಅಶ್ವಿನಿ ಅವರ ಪೋಷಕರು ಅಮೆರಿಕದಲ್ಲಿ ನೆಲೆಸಿದ್ದ ಸಾಫ್ಟ್‌ವೇರ್ ಎಂಜಿನಿಯರ್ ಒಬ್ಬರ ಸಂಬಂಧವನ್ನು ತಂದಿದ್ದರು. ಆದರೆ ಅಶ್ವಿನಿ ಅವರು ಪ್ರೀತಿಗಾಗಿ ಅದನ್ನು ತಿರಸ್ಕರಿಸಿದರು.

8. ಅಶ್ವಿನಿ ಮತ್ತು ಅಪ್ಪು ಮದುವೆಯಲ್ಲಿ ಪಾರ್ವತಮ್ಮ ರಾಜ್‌ಕುಮಾರ್ ಅವರ ಪಾತ್ರವೇನು?

ಮದುವೆಗೆ ಅಶ್ವಿನಿ ಮನೆಯವರ ವಿರೋಧವಿದ್ದಾಗ, ಪಾರ್ವತಮ್ಮನವರು ಖುದ್ದಾಗಿ ಅವರ ಮನೆಗೆ ಭೇಟಿ ನೀಡಿ ಪೋಷಕರ ಮನವೊಲಿಸಿದರು ಮತ್ತು ಅಶ್ವಿನಿ ಅವರಿಗೆ ‘ಹೂ ಮುಡಿಸುವ ಶಾಸ್ತ್ರ’ ಮಾಡುವ ಮೂಲಕ ಮದುವೆಯನ್ನು ಖಚಿತಪಡಿಸಿದರು.

9. ಪುನೀತ್ ರಾಜ್‌ಕುಮಾರ್ ಅವರ ಯಾವ ವಿಷಯ ಅಶ್ವಿನಿ ಅವರಿಗೆ ಅರ್ಥವಾಗುತ್ತಿರಲಿಲ್ಲ?

ಪುನೀತ್ ರಾಜ್‌ಕುಮಾರ್ ಅವರ ಕೈಬರಹ (Handwriting) ಅಶ್ವಿನಿ ಅವರಿಗೆ ಅರ್ಥವಾಗುತ್ತಿರಲಿಲ್ಲ. ಅಪ್ಪು ಬರೆದ ಗ್ರೀಟಿಂಗ್ ಕಾರ್ಡ್‌ಗಳನ್ನು ಅವರಿಗೇ ಓದಲು ಹೇಳುತ್ತಿದ್ದರಂತೆ ಅಶ್ವಿನಿ.

10. ಅಶ್ವಿನಿ ಮತ್ತು ಪುನೀತ್ ಅವರ ಮದುವೆ ನಡೆದದ್ದು ಯಾವಾಗ ಮತ್ತು ಎಷ್ಟು ಜನ ಭಾಗವಹಿಸಿದ್ದರು?

ಅಶ್ವಿನಿ ಮತ್ತು ಪುನೀತ್ ಅವರ ವಿವಾಹವು 1999ರ ಡಿಸೆಂಬರ್ 1ರಂದು ಬೆಂಗಳೂರಿನ ಅರಮನೆ ಮೈದಾನದಲ್ಲಿ ನಡೆಯಿತು. ಈ ಮಹಾ ವಿವಾಹಕ್ಕೆ ಸುಮಾರು 48,000 ಜನ ಸಾಕ್ಷಿಯಾಗಿದ್ದರು.

11. ಪುನೀತ್ ಮತ್ತು ಅಶ್ವಿನಿ ದಂಪತಿಗೆ ಎಷ್ಟು ಮಕ್ಕಳಿದ್ದಾರೆ?

ಈ ದಂಪತಿಗೆ ದೃತಿ ಮತ್ತು ವಂದಿತಾ ಎಂಬ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ.

12. ಪುನೀತ್ ರಾಜ್‌ಕುಮಾರ್ ಅವರು ನಿಧನರಾದದ್ದು ಯಾವಾಗ?

ಕೋಟಿ ಕನ್ನಡಿಗರ ನೆಚ್ಚಿನ ಅಪ್ಪು ಅಕ್ಟೋಬರ್ 29, 2021 ರಂದು ತೀವ್ರ ಹೃದಯಾಘಾತದಿಂದ ನಿಧನರಾದರು.