International
oi-Pragathi S
ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರಿನ ಜೀವನಾಡಿ ‘ನಮ್ಮ ಮೆಟ್ರೋ’ ಕೇವಲ ಕರುನಾಡಿಗೆ ಮಾತ್ರವಲ್ಲ, ಇದೀಗ ಜಾಗತಿಕ ಮಟ್ಟದಲ್ಲೂ ಪ್ರಶಂಸೆಗೆ ಪಾತ್ರವಾಗುತ್ತಿದೆ. ಇತ್ತೀಚೆಗಷ್ಟೇ ಲಂಡನ್ ಪ್ರವಾಸಕ್ಕೆ ತೆರಳಿದ್ದ ಯುವತಿಯೊಬ್ಬರು, ಜಗತ್ತಿನ ಅತ್ಯಂತ ಹಳೆಯ ಹಾಗೂ ಪ್ರಸಿದ್ಧ ‘ಲಂಡನ್ ಅಂಡರ್ಗ್ರೌಂಡ್’ (ಟ್ಯೂಬ್) ರೈಲಿಗಿಂತ ನಮ್ಮ ಬೆಂಗಳೂರಿನ ಮೆಟ್ರೋ ಎಷ್ಟೋ ಪಾಲು ಉತ್ತಮ ಮತ್ತು ಆರಾಮದಾಯಕ ಎಂದು ತನ್ನ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಈ ಪೋಸ್ಟ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ನೆಟ್ಟಿಗರ ಗಮನ ಸೆಳೆಯುತ್ತಿದೆ.
ಯಾರೂ ಮಾತನಾಡದ ಮೆಟ್ರೋ ಹೋಲಿಕೆ
“ದಿ ಮೆಟ್ರೋ ಕಂಪ್ಯಾರಿಸನ್ ನೋಬಡಿ ಟಾಕ್ಸ್ ಅಬೌಟ್” (ಯಾರೂ ಮಾತನಾಡದ ಮೆಟ್ರೋ ಹೋಲಿಕೆ) ಎಂಬ ಶೀರ್ಷಿಕೆಯಡಿಯಲ್ಲಿ ಈ ಯುವತಿ ತನ್ನ ಅನುಭವವನ್ನು ಹಂಚಿಕೊಂಡಿದ್ದಾಳೆ. ಇಂಗ್ಲೆಂಡ್ ರಾಜಧಾನಿ ಲಂಡನ್ನ ಪ್ರಸಿದ್ಧ ಟವರ್ ಬ್ರಿಡ್ಜ್ ಕಡೆಗೆ ಪ್ರಯಾಣಿಸುವಾಗ ಆಕೆಗೆ ಅನಿರೀಕ್ಷಿತ ಅನುಭವವೊಂದು ಎದುರಾಗಿದೆ. ಚಳಿಗಾಲದ ದೇಶವಾದ ಲಂಡನ್ನ ಮೆಟ್ರೋ ರೈಲಿನಲ್ಲಿ ಪ್ರಯಾಣಿಸುವಾಗ ಆಕೆಗೆ ವಿಪರೀತ ಬೆವರಲು ಪ್ರಾರಂಭವಾಗಿದೆ. ಮೆಟ್ರೋ ರೈಲಿನೊಳಗೆ ಹವಾನಿಯಂತ್ರಣ (AC) ವ್ಯವಸ್ಥೆ ಇರದಿರುವುದೇ ಇದಕ್ಕೆ ಪ್ರಮುಖ ಕಾರಣ.
“ಲಂಡನ್ನ ಹಲವು ಮೆಟ್ರೋ ರೈಲುಗಳು ಹಾಗೂ ನಿಲ್ದಾಣಗಳಲ್ಲಿ ಎಸಿ ವ್ಯವಸ್ಥೆಯೇ ಇಲ್ಲ. ಇದು ಪ್ರಯಾಣವನ್ನು ಅತ್ಯಂತ ತ್ರಾಸದಾಯಕವಾಗಿಸುತ್ತದೆ. ಅದರಲ್ಲೂ ಜನದಟ್ಟಣೆಯಿರುವ ಪೀಕ್ ಅವರ್ಗಳಲ್ಲಿ, ಎಸಿ ಇಲ್ಲದ ರೈಲ್ವೆ ಪ್ಲಾಟ್ಫಾರ್ಮ್ನಲ್ಲಿ ನಿಂತಂತೆ ಭಾಸವಾಗುತ್ತದೆ. ಬಿಸಿಲು ಮತ್ತು ದಟ್ಟಣೆಯಿಂದ ಕೂಡಿದ ಈ ವಾತಾವರಣ ನನಗೆ ನಿಜಕ್ಕೂ ದೊಡ್ಡ ಸಾಂಸ್ಕೃತಿಕ ಆಘಾತ ಉಂಟುಮಾಡಿತು” ಎಂದು ಯುವತಿ ಬರೆದುಕೊಂಡಿದ್ದಾರೆ.
ಲಂಡನ್ ಅಂಡರ್ಗ್ರೌಂಡ್ ವಾಸ್ತವ
ಲಂಡನ್ನ ಅಂಡರ್ಗ್ರೌಂಡ್ ರೈಲು ವ್ಯವಸ್ಥೆಯು ಶತಮಾನಕ್ಕೂ ಹಳೆಯದು. ಅದರಲ್ಲೂ ವಿಶೇಷವಾಗಿ ಸೆಂಟ್ರಲ್, ಬೇಕರ್ಲೂ, ಪಿಕಾಡಿಲಿ ಮತ್ತು ನಾರ್ದರ್ನ್ನಂತಹ ಹಳೆಯ ಡೀಪ್-ಲೆವೆಲ್ ಲೈನ್ಗಳಲ್ಲಿ ಹವಾನಿಯಂತ್ರಣ ವ್ಯವಸ್ಥೆ ಇಲ್ಲ. ಈ ಸುರಂಗಗಳು ಅತ್ಯಂತ ಕಿರಿದಾಗಿದ್ದು, ನೂರಕ್ಕೂ ಹೆಚ್ಚು ವರ್ಷಗಳ ಹಿಂದೆ ನಿರ್ಮಿಸಲಾಗಿವೆ. ಹೀಗಾಗಿ ತಾಂತ್ರಿಕವಾಗಿ ಇಲ್ಲಿ ಹೊಸದಾಗಿ ಎಸಿ ವ್ಯವಸ್ಥೆಯನ್ನು ಅಳವಡಿಸುವುದು ಅತ್ಯಂತ ಸವಾಲಿನ ಹಾಗೂ ಕಷ್ಟದ ಕೆಲಸವಾಗಿದೆ. ಇದೇ ಕಾರಣಕ್ಕೆ ಪ್ರಯಾಣಿಕರು ಸೆಖೆಯಲ್ಲೇ ಪ್ರಯಾಣಿಸಬೇಕಾದ ಅನಿವಾರ್ಯತೆ ಇದೆ.
ನಮ್ಮ ಮೆಟ್ರೋದ ಹೆಮ್ಮೆ
ಇದಕ್ಕೆ ತದ್ವಿರುದ್ಧವಾಗಿ, ತನ್ನ ತಾಯ್ನಾಡಿನ ಬೆಂಗಳೂರಿನ ಮೆಟ್ರೋ ಪ್ರಯಾಣದ ಅನುಭವವನ್ನು ಆಕೆ ಹೆಮ್ಮೆಯಿಂದ ಹಂಚಿಕೊಂಡಿದ್ದಾಳೆ. “ನಾನು ಬೆಂಗಳೂರಿನಲ್ಲಿ ಮೆಟ್ರೋ ನಿಲ್ದಾಣದೊಳಗೆ ಕಾಲಿಟ್ಟ ಕ್ಷಣವೇ, ಸಂಪೂರ್ಣವಾಗಿ ಹವಾನಿಯಂತ್ರಿತ ವಾತಾವರಣ ನನ್ನನ್ನು ಸ್ವಾಗತಿಸುತ್ತದೆ. ನಿಲ್ದಾಣ ಹಾಗೂ ರೈಲು ಎರಡರಲ್ಲೂ ಎಸಿ ಇರುತ್ತದೆ. ಇದು ತಂಪಾಗಿ, ಆರಾಮದಾಯಕವಾಗಿ ಹಾಗೂ ಇಲ್ಲಿನ ಹವಾಮಾನಕ್ಕೆ ತಕ್ಕಂತೆ ಅದ್ಭುತವಾಗಿ ವಿನ್ಯಾಸಗೊಳಿಸಲಾಗಿದೆ” ಎಂದು ಸಂತಸ ವ್ಯಕ್ತಪಡಿಸಿದ್ದಾಳೆ. ದಕ್ಷಿಣ ಭಾರತದ ಮೊಟ್ಟಮೊದಲ ಮೆಟ್ರೋ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಬೆಂಗಳೂರಿನ ‘ನಮ್ಮ ಮೆಟ್ರೋ’ 2011ರಲ್ಲಿ ಕಾರ್ಯಾಚರಣೆ ಆರಂಭಿಸಿತು. ಪ್ರಾರಂಭದಿಂದಲೇ ಪ್ರಯಾಣಿಕರ ಅನುಕೂಲಕ್ಕಾಗಿ ಸಂಪೂರ್ಣ ಹವಾನಿಯಂತ್ರಿತ ರೈಲುಗಳು ಮತ್ತು ನಿಲ್ದಾಣಗಳನ್ನು ವಿನ್ಯಾಸಗೊಳಿಸಲಾಗಿದೆ.
ನೆಟ್ಟಿಗರ ಪ್ರತಿಕ್ರಿಯೆ
ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ, ಹಲವು ನೆಟ್ಟಿಗರು ತಮ್ಮದೇ ಆದ ಲಂಡನ್ ಹಾಗೂ ಯುರೋಪ್ ಪ್ರವಾಸದ ಅನುಭವಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. “ನಾವು ಯಾವಾಗಲೂ ಪಾಶ್ಚಿಮಾತ್ಯ ದೇಶಗಳ ಮೂಲಸೌಕರ್ಯಗಳನ್ನು ನೋಡಿ ಬೆರಗಾಗುತ್ತೇವೆ. ಆದರೆ ವಾಸ್ತವವಾಗಿ ಒಮ್ಮೆ ಅಲ್ಲಿಗೆ ಭೇಟಿ ನೀಡಿದಾಗಲೇ ನಮ್ಮ ದೇಶದ ಅಭಿವೃದ್ಧಿ ಹಾಗೂ ಸೌಲಭ್ಯಗಳ ನೈಜ ಬೆಲೆ ಅರಿವಾಗುವುದು” ಎಂದು ಬಳಕೆದಾರರೊಬ್ಬರು ಕಮೆಂಟ್ ಮಾಡಿದ್ದಾರೆ. ಮುಂದುವರಿದ ರಾಷ್ಟ್ರವಾದ ಬ್ರಿಟನ್ಗೆ ಹೋಲಿಸಿದರೆ, ನಮ್ಮ ಬೆಂಗಳೂರಿನ ಮೂಲಸೌಕರ್ಯಗಳು ಎಷ್ಟು ಮುಂದಿವೆ ಎಂಬುದಕ್ಕೆ ಈ ವೈರಲ್ ಪೋಸ್ಟ್ ಸ್ಪಷ್ಟ ನಿದರ್ಶನವಾಗಿದೆ.
Disclaimer: This content was automatically imported from a third-party source via RSS feed. The original source is: https://kannada.oneindia.com/news/international/bengaluru-namma-metro-better-than-london-underground-womans-viral-post-highlights-ac-struggles-447661.html. xn--babytilbehr-pgb.com does not claim ownership of this content. All rights remain with the original publisher.
