International
oi-Pragathi S
ಇಂಡೋನೇಷ್ಯಾದಲ್ಲಿ ಮತ್ತೊಮ್ಮೆ ವರುಣನ ಹಾಗೂ ಪ್ರಕೃತಿಯ ಮುನಿಸು ಜೋರಾಗಿದೆ. ದಕ್ಷಿಣ ಏಷ್ಯಾ ರಾಷ್ಟ್ರ ಇಂಡೋನೇಷ್ಯಾದಲ್ಲಿ ಗುರುವಾರ (ಏಪ್ರಿಲ್ 02) ಮುಂಜಾನೆ ಭಾರಿ ಪ್ರಬಲ ಭೂಕಂಪ ಸಂಭವಿಸಿದೆ. ಇಂಡೋನೇಷ್ಯಾದ ಟೆರ್ನೇಟ್ ಬಳಿಯ ಉತ್ತರ ಮೊಲುಕ್ಕಾ ಸಮುದ್ರದಲ್ಲಿ 7.4 ತೀವ್ರತೆಯ ಪ್ರಬಲ ಭೂಕಂಪ ಅಪ್ಪಳಿಸಿದ್ದು, ಕರಾವಳಿ ಪ್ರದೇಶಗಳಲ್ಲಿ ತೀವ್ರ ಆತಂಕದ ವಾತಾವರಣ ಸೃಷ್ಟಿಯಾಗಿದೆ.
ಅಮೆರಿಕದ ಜಿಯೋಲಾಜಿಕಲ್ ಸರ್ವೆ (USGS) ಬಿಡುಗಡೆ ಮಾಡಿರುವ ವರದಿಗಳ ಪ್ರಕಾರ, ಭೂಕಂಪವು ಭೂಮಿಯ ಮೇಲ್ಮೈಯಿಂದ ಕೇವಲ 10 ಕಿಲೋಮೀಟರ್ (6.21 ಮೈಲಿ) ಆಳದಲ್ಲಿ ಸಂಭವಿಸಿದೆ. ಇದರ ಪರಿಣಾಮವಾಗಿ ಇಂಡೋನೇಷ್ಯಾ ಸೇರಿದಂತೆ ನೆರೆಯ ಹಲವು ರಾಷ್ಟ್ರಗಳಿಗೆ ದಿಢೀರ್ ಸುನಾಮಿ ಮುನ್ನೆಚ್ಚರಿಕೆ ನೀಡಲಾಗಿತ್ತು. ಆದರೆ, ಈ ಪ್ರಾಕೃತಿಕ ವಿಕೋಪದಿಂದ ಭಾರತಕ್ಕೆ ಯಾವುದೇ ಹಾನಿಯಿಲ್ಲ ಎಂಬುದು ಸದ್ಯದ ಸಮಾಧಾನಕರ ಸಂಗತಿ.
ಮೊಲುಕ್ಕಾ ಸಮುದ್ರದಲ್ಲಿ ಉಂಟಾದ ಈ ಪ್ರಬಲ ಭೂಕಂಪದ ಕೇಂದ್ರ ಬಿಂದುವು ಇಂಡೋನೇಷ್ಯಾದ ಟೆರ್ನೇಟ್ ನಗರದಿಂದ ಸುಮಾರು 120 ಕಿ.ಮೀ ದೂರದಲ್ಲಿದೆ. ಅದೇ ರೀತಿ, ಫಿಲಿಪ್ಪೀನ್ಸ್ ಕರಾವಳಿಯಿಂದ 580 ಕಿ.ಮೀ ಮತ್ತು ಮಲೇಷ್ಯಾದ ಸಬಾದಿಂದ ಬರೋಬ್ಬರಿ 1,000 ಕಿ.ಮೀ ಅಂತರದಲ್ಲಿದೆ. ಅಮೆರಿಕದ ಸುನಾಮಿ ಎಚ್ಚರಿಕೆ ಕೇಂದ್ರದ ಪ್ರಾಥಮಿಕ ಮಾಹಿತಿಯಂತೆ, ಭೂಕಂಪನವು ಮೇಲ್ಮೈಗೆ ತೀರಾ ಸಮೀಪದಲ್ಲಿ ಸಂಭವಿಸಿರುವುದರಿಂದ ಸಮುದ್ರದಲ್ಲಿ ಅಪಾಯಕಾರಿ ಅಲೆಗಳು ಏಳುವ ಸಾಧ್ಯತೆ ದಟ್ಟವಾಗಿತ್ತು. ಹೀಗಾಗಿ ಭೂಕಂಪದ ಕೇಂದ್ರ ಬಿಂದುವಿನಿಂದ 1,000 ಕಿಲೋಮೀಟರ್ ವ್ಯಾಪ್ತಿಯಲ್ಲಿರುವ ಇಂಡೋನೇಷ್ಯಾ, ಫಿಲಿಪ್ಪೀನ್ಸ್ ಮತ್ತು ಮಲೇಷ್ಯಾ ಕರಾವಳಿ ತೀರಗಳಿಗೆ ಸುನಾಮಿ ಅಪ್ಪಳಿಸುವ ಅಪಾಯವಿದೆ ಎಂದು ಎಚ್ಚರಿಸಲಾಗಿತ್ತು. ತಕ್ಷಣವೇ ಎಚ್ಚೆತ್ತ ವಿಪತ್ತು ನಿರ್ವಹಣಾ ಪಡೆಗಳು ಈ ಭಾಗದ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಸೂಚನೆ ನೀಡಿದ್ದವು.
ಸುನಾಮಿ ಭೀತಿಯಿಂದ ಪಾರಾದ ಫಿಲಿಪ್ಪೀನ್ಸ್, ಮಲೇಷ್ಯಾ
ಭೂಕಂಪದ ತೀವ್ರತೆ ಹೆಚ್ಚಿದ್ದರೂ, ಅದೃಷ್ಟವಶಾತ್ ನೆರೆಯ ರಾಷ್ಟ್ರಗಳಿಗೆ ಯಾವುದೇ ಹಾನಿಕಾರಕ ಸುನಾಮಿಯ ಭೀತಿ ಇಲ್ಲ ಎಂಬುದು ಸ್ಪಷ್ಟವಾಗಿದೆ. ಫಿಲಿಪ್ಪೀನ್ಸ್ನ ಭೂಕಂಪನಶಾಸ್ತ್ರ ಸಂಸ್ಥೆ ‘ಫಿವೊಲ್ಕ್ಸ್’ (Phivolcs) ಬಿಡುಗಡೆ ಮಾಡಿರುವ ಇತ್ತೀಚಿನ ದತ್ತಾಂಶಗಳ ಪ್ರಕಾರ, ಈ ಭೂಕಂಪದಿಂದ ಫಿಲಿಪ್ಪೀನ್ಸ್ಗೆ ಯಾವುದೇ ವಿನಾಶಕಾರಿ ಸುನಾಮಿಯ ಆತಂಕವಿಲ್ಲ ಎಂದು ಸ್ಪಷ್ಟಪಡಿಸಿ ಜನರನ್ನು ನಿರಾಳಗೊಳಿಸಿದೆ. ಅದೇ ರೀತಿ, ಮಲೇಷ್ಯಾದ ಹವಾಮಾನ ಇಲಾಖೆ ಕೂಡ ತನ್ನ ಅಧಿಕೃತ ಫೇಸ್ಬುಕ್ ಪುಟದಲ್ಲಿ ಪ್ರಕಟಣೆ ಹೊರಡಿಸಿದ್ದು, “ಸದ್ಯಕ್ಕೆ ಮಲೇಷ್ಯಾಕ್ಕೆ ಯಾವುದೇ ಸುನಾಮಿ ಸಂಭವಿಸುವ ಎಚ್ಚರಿಕೆ ಇಲ್ಲ. ಆದಾಗ್ಯೂ, ನಾವು ಸಮುದ್ರದಲ್ಲಿನ ಬದಲಾವಣೆಗಳು ಮತ್ತು ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದೇವೆ” ಎಂದು ಮಾಹಿತಿ ಹಂಚಿಕೊಂಡಿದೆ.
ಭಾರತದ ಮೇಲಾಗುವ ಪರಿಣಾಮವೇನು?
ಇಂಡೋನೇಷ್ಯಾದ ಈ ಪ್ರಬಲ ಭೂಕಂಪದಿಂದ ಭಾರತಕ್ಕೆ ಯಾವುದೇ ರೀತಿಯ ಅಪಾಯ ಅಥವಾ ಸುನಾಮಿ ಬೆದರಿಕೆ ಇಲ್ಲ ಎಂದು ಹವಾಮಾನ ಮತ್ತು ಭೂಕಂಪನ ತಜ್ಞರು ಸ್ಪಷ್ಟಪಡಿಸಿದ್ದಾರೆ. ಭೂಕಂಪದ ಕೇಂದ್ರ ಬಿಂದುವು ಭಾರತದ ಕರಾವಳಿಯಿಂದ ಸಾವಿರಾರು ಕಿಲೋಮೀಟರ್ ದೂರವಿರುವ ಕಾರಣ, ಭಾರತೀಯರು ಯಾವುದೇ ಆತಂಕಪಡುವ ಅಗತ್ಯವಿಲ್ಲ. ಮುನ್ನೆಚ್ಚರಿಕಾ ಕ್ರಮವಾಗಿ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳ ಬಳಿಯೂ ಯಾವುದೇ ಅಲೆಗಳ ಅಬ್ಬರದ ಮುನ್ಸೂಚನೆ ಇಲ್ಲ ಎಂದು ತಿಳಿದುಬಂದಿದೆ.
ಇಂಡೋನೇಷ್ಯಾದಲ್ಲಿನ ಪ್ರಸ್ತುತ ಪರಿಸ್ಥಿತಿ
ಭೌಗೋಳಿಕವಾಗಿ ‘ರಿಂಗ್ ಆಫ್ ಫೈರ್’ (Ring of Fire) ವಲಯದಲ್ಲಿರುವ ಇಂಡೋನೇಷ್ಯಾವು ಇಂತಹ ಪ್ರಾಕೃತಿಕ ವಿಕೋಪಗಳಿಗೆ ಸದಾ ತುತ್ತಾಗುತ್ತಲೇ ಇರುತ್ತದೆ. ಇಂದಿನ ಭೂಕಂಪದಿಂದಾಗಿ ಇಂಡೋನೇಷ್ಯಾದ ಮನಾಡೊ ಮತ್ತು ಟೆರ್ನೇಟ್ ದ್ವೀಪ ಭಾಗಗಳಲ್ಲಿ ಭೂಮಿ ಕಂಪಿಸಿದ ಅನುಭವವಾಗಿದೆ. ಪರಿಣಾಮವಾಗಿ ಕೆಲವು ಕಟ್ಟಡಗಳಿಗೆ ಹಾನಿಯಾಗಿದ್ದು, ಓರ್ವ ವ್ಯಕ್ತಿ ಸಾವನ್ನಪ್ಪಿರುವ ಬಗ್ಗೆ ವರದಿಗಳು ಬಂದಿವೆ. ಸ್ಥಳೀಯ ರಕ್ಷಣಾ ಪಡೆಗಳು ಕಾರ್ಯಾಚರಣೆಯಲ್ಲಿ ತೊಡಗಿದ್ದು, ಕರಾವಳಿ ಭಾಗದ ಜನರು ಎಚ್ಚರಿಕೆಯಿಂದ ಇರುವಂತೆ ಮತ್ತು ಸಮುದ್ರ ತೀರಕ್ಕೆ ತೆರಳದಂತೆ ಸ್ಥಳೀಯ ಆಡಳಿತ ಕಟ್ಟುನಿಟ್ಟಿನ ಸೂಚನೆ ನೀಡಿದೆ. ಸದ್ಯ ಸುನಾಮಿ ಭೀತಿ ದೂರವಾಗಿರುವುದು ಏಷ್ಯಾ ಖಂಡದ ಹಲವು ದೇಶಗಳಿಗೆ ನೆಮ್ಮದಿ ತಂದಿದೆ.
Disclaimer: This content was automatically imported from a third-party source via RSS feed. The original source is: https://kannada.oneindia.com/news/international/indonesia-earthquake-today-7-4-magnitude-hits-ternate-tsunami-warning-issued-for-asian-coasts-449109.html. xn--babytilbehr-pgb.com does not claim ownership of this content. All rights remain with the original publisher.
