Karnataka
oi-Pragathi S
ಕರ್ನಾಟಕ ಶಾಲಾ ಪರೀಕ್ಷೆ ಮತ್ತು ಮೌಲ್ಯನಿರ್ಣಯ ಮಂಡಳಿ (KSEAB) ನಡೆಸುತ್ತಿರುವ 2026ನೇ ಸಾಲಿನ ಎಸ್ಎಸ್ಎಲ್ಸಿ ವಾರ್ಷಿಕ ಪರೀಕ್ಷೆಗಳು ನಾಳೆಯಿಂದ, ಅಂದರೆ ಮಾರ್ಚ್ 18ರಿಂದ ರಾಜ್ಯಾದ್ಯಂತ ಅಧಿಕೃತವಾಗಿ ಆರಂಭವಾಗಲಿವೆ. ಮೊದಲ ದಿನವೇ ವಿದ್ಯಾರ್ಥಿಗಳು ಕನ್ನಡ ಭಾಷಾ ಪರೀಕ್ಷೆಯನ್ನು ಎದುರಿಸಲಿದ್ದಾರೆ. ಪರೀಕ್ಷೆಗೆ ಕೇವಲ ಒಂದು ದಿನ ಮಾತ್ರ ಬಾಕಿ ಉಳಿದಿರುವುದರಿಂದ, ವಿದ್ಯಾರ್ಥಿಗಳು ತಮ್ಮ ಅಂತಿಮ ಹಂತದ ಸಿದ್ಧತೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಕೊನೆಯ 24 ಗಂಟೆಗಳಲ್ಲಿ ಯಾವುದೇ ದಿಕ್ಕುದೆಸೆಯಿಲ್ಲದೆ ಸಿಕ್ಕಿದ್ದನ್ನೆಲ್ಲಾ ಓದುವ ಬದಲು, ಅತಿ ಹೆಚ್ಚು ಅಂಕಗಳನ್ನು ತಂದುಕೊಡುವ ಪ್ರಮುಖ ವಿಷಯಗಳತ್ತ ಗಮನಹರಿಸುವುದು ಹಾಗೂ ಸ್ಮಾರ್ಟ್ ಆಗಿ ರಿವಿಷನ್ ಮಾಡುವುದು ಅತ್ಯಂತ ಜಾಣತನದ ನಡೆಯಾಗಿದೆ. ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಪರೀಕ್ಷಾ ಸಮಯ, ಮಾರ್ಗಸೂಚಿಗಳು ಮತ್ತು ಅಂತಿಮ ಕ್ಷಣದ ಪ್ರಮುಖ ವಿಷಯಗಳ ವಿವರ ಇಲ್ಲಿದೆ.
ಪರೀಕ್ಷಾ ಸಮಯ ಮತ್ತು ಪ್ರಮುಖ ನಿಯಮಗಳು
ಅಧಿಕೃತ ವೇಳಾಪಟ್ಟಿಯ ಪ್ರಕಾರ, ಎಸ್ಎಸ್ಎಲ್ಸಿ ಕನ್ನಡ ಪರೀಕ್ಷೆಯು ಒಂದೇ ಪಾಳಿಯಲ್ಲಿ ನಡೆಯಲಿದೆ. ಬೆಳಿಗ್ಗೆ 10:00 ಗಂಟೆಗೆ ಸರಿಯಾಗಿ ಪರೀಕ್ಷೆ ಆರಂಭವಾಗಲಿದ್ದು, ಮಧ್ಯಾಹ್ನ 1:15ರವರೆಗೆ ನಡೆಯಲಿದೆ. ಇದರಲ್ಲಿ ಪ್ರಶ್ನೆಪತ್ರಿಕೆಯನ್ನು ಓದಿಕೊಳ್ಳಲು ಮತ್ತು ಅರ್ಥಮಾಡಿಕೊಳ್ಳಲು ವಿದ್ಯಾರ್ಥಿಗಳಿಗೆ ಆರಂಭದ 15 ನಿಮಿಷಗಳ ಮೀಸಲು ಕಾಲಾವಕಾಶ ನೀಡಲಾಗುತ್ತದೆ. ಕೊನೆಯ ಕ್ಷಣದ ಗಡಿಬಿಡಿಯನ್ನು ತಪ್ಪಿಸಲು ವಿದ್ಯಾರ್ಥಿಗಳು ಕನಿಷ್ಠ 30 ನಿಮಿಷಗಳ ಮುಂಚಿತವಾಗಿ ಪರೀಕ್ಷಾ ಕೇಂದ್ರವನ್ನು ತಲುಪುವುದು ಸೂಕ್ತ. ಸುಗಮ ಪ್ರವೇಶ ಮತ್ತು ಭದ್ರತಾ ತಪಾಸಣೆಗಾಗಿ ಬೆಳಿಗ್ಗೆ 9:45ರ ಒಳಗೆ ಪರೀಕ್ಷಾ ಕೇಂದ್ರದಲ್ಲಿ ಹಾಜರಿರುವುದು ಒಳಿತು.
ಪರೀಕ್ಷಾ ಕೇಂದ್ರಕ್ಕೆ ಹೋಗುವಾಗ ಕಡ್ಡಾಯವಾಗಿ ಎಸ್ಎಸ್ಎಲ್ಸಿ ಹಾಲ್ ಟಿಕೆಟ್ (ಪ್ರವೇಶ ಪತ್ರ) ತೆಗೆದುಕೊಂಡು ಹೋಗುವುದನ್ನು ಮರೆಯಬೇಡಿ. ಮೊಬೈಲ್ ಫೋನ್, ಸ್ಮಾರ್ಟ್ ವಾಚ್ ಸೇರಿದಂತೆ ಯಾವುದೇ ಎಲೆಕ್ಟ್ರಾನಿಕ್ ವಸ್ತುಗಳನ್ನು ಪರೀಕ್ಷಾ ಕೇಂದ್ರದೊಳಗೆ ಕೊಂಡೊಯ್ಯುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ಪರೀಕ್ಷಾ ಕೊಠಡಿಯಲ್ಲಿ ಮೇಲ್ವಿಚಾರಕರು ನೀಡುವ ಎಲ್ಲಾ ಸೂಚನೆಗಳನ್ನು ವಿದ್ಯಾರ್ಥಿಗಳು ಚಾಚೂತಪ್ಪದೆ ಪಾಲಿಸಬೇಕು.
ಕೊನೆಯ 24 ಗಂಟೆಗಳಲ್ಲಿ ಏನನ್ನು ಓದಬೇಕು?
ಕನ್ನಡ ಪರೀಕ್ಷೆಯಲ್ಲಿ ಸುಲಭವಾಗಿ ಮತ್ತು ಹೆಚ್ಚು ಅಂಕಗಳನ್ನು ಗಳಿಸಲು ಪಠ್ಯಕ್ರಮದ ಕೆಲವೊಂದು ನಿರ್ದಿಷ್ಟ ಭಾಗಗಳ ಮೇಲೆ ಹೆಚ್ಚಿನ ಗಮನ ಹರಿಸುವುದು ಅಗತ್ಯ. ಪ್ರತಿ ವರ್ಷ ಪರೀಕ್ಷೆಯಲ್ಲಿ ಪುನರಾವರ್ತನೆಯಾಗುವ ಪ್ರಮುಖ ವಿಷಯಗಳ ಪಟ್ಟಿ ಇಲ್ಲಿದೆ:
1. ವ್ಯಾಕರಣ ವಿಭಾಗ : ವ್ಯಾಕರಣದಲ್ಲಿ ನಿಖರವಾದ ಉತ್ತರ ಬರೆದರೆ ಪೂರ್ಣ ಅಂಕಗಳು ಸಿಗುತ್ತವೆ. ಹೀಗಾಗಿ, ಸಂಧಿಗಳು, ಸಮಾಸಗಳು, ತತ್ಸಮ-ತದ್ಭವ, ನಾನಾರ್ಥಗಳು, ಅಲಂಕಾರ, ಕೃದಂತಗಳು ಮತ್ತು ಲೇಖನ ಚಿಹ್ನೆಗಳ ಬಗ್ಗೆ ಮತ್ತೊಮ್ಮೆ ಕಣ್ಣಾಡಿಸಿ. ಇವುಗಳ ನಿಯಮಗಳು ಮತ್ತು ಉದಾಹರಣೆಗಳನ್ನು ಸ್ಪಷ್ಟವಾಗಿ ನೆನಪಿಟ್ಟುಕೊಳ್ಳಿ.
2. ಗದ್ಯ ಭಾಗ: ಗದ್ಯ ವಿಭಾಗದಲ್ಲಿ ‘ಶಬರಿ’, ‘ಮಾತೃಭೂಮಿ’, ‘ಭಾಗ್ಯಶಿಲ್ಪಿಗಳು’, ‘ವ್ಯಾಘ್ರಗೀತೆ’ ಮತ್ತು ‘ಹಲಗಲಿ ಬೇಡರು’ ಪಾಠಗಳು ಪರೀಕ್ಷಾ ದೃಷ್ಟಿಯಿಂದ ಬಹಳ ಮುಖ್ಯವಾಗಿವೆ. ಈ ಪಾಠಗಳ ಲೇಖಕರ ಹೆಸರು, ಪಾಠದ ಆಶಯ ಮತ್ತು ಸಂದರ್ಭ ಸಹಿತ ವಿವರಿಸುವ ವಾಕ್ಯಗಳನ್ನು ಚೆನ್ನಾಗಿ ಓದಿಕೊಳ್ಳಿ.
3. ಪದ್ಯ ಭಾಗ : ‘ಸಂಕಲ್ಪ ಗೀತೆ’, ‘ಹಚ್ಚೇವು ಕನ್ನಡದ ದೀಪ’, ‘ಕೌರವೀಂದ್ರನ ಕೊಂದೆ ನೀನೆನುವೆ’ ಮತ್ತು ‘ವಚನಗಳು’ – ಈ ಪದ್ಯಗಳ ಸಾರಾಂಶವನ್ನು ಸ್ವಂತ ವಾಕ್ಯದಲ್ಲಿ ಬರೆಯಲು ಅಭ್ಯಾಸ ಮಾಡಿ. ಜೊತೆಗೆ, ಕಂಠಪಾಠಕ್ಕೆ ನಿಗದಿಪಡಿಸಿದ ಪದ್ಯದ ಸಾಲುಗಳನ್ನು ತಪ್ಪುಗಳಿಲ್ಲದೆ ಬರೆಯಲು ಪ್ರಾಕ್ಟೀಸ್ ಮಾಡಿ.
4. ಪಠ್ಯಪೂರಕ ಅಧ್ಯಯನ: ‘ಶನಿಮಹಾತ್ಮನ ಪ್ರಸಂಗ’ ಮತ್ತು ‘ಸ್ಥಿತಪ್ರಜ್ಞ’ ಪಾಠಗಳಿಂದ ಕಡ್ಡಾಯವಾಗಿ ಪ್ರಶ್ನೆಗಳು ಬರುವುದರಿಂದ, ಈ ಉಪಪಾಠಗಳ ಕಥೆಯ ತಿರುಳನ್ನು ಮತ್ತು ಪ್ರಮುಖ ಪಾತ್ರಗಳನ್ನು ಅರ್ಥಮಾಡಿಕೊಂಡಿರಿ.
5. ಬರವಣಿಗೆ ಕೌಶಲ್ಯ : ವೈಯಕ್ತಿಕ ಮತ್ತು ಅಧಿಕೃತ ಪತ್ರಲೇಖನದ ನಮೂನೆ ಹೇಗಿರಬೇಕು ಎಂಬುದನ್ನು ಗಮನಿಸಿ. ಪ್ರಬಂಧ ಬರೆಯುವಾಗ ಪೀಠಿಕೆ, ವಿಷಯ ವಿವರಣೆ ಮತ್ತು ಉಪಸಂಹಾರ ಇರುವಂತೆ ನೋಡಿಕೊಳ್ಳಿ. ಅಪರಿಚಿತ ಗದ್ಯವನ್ನು ಓದಿ ಅರ್ಥೈಸಿಕೊಂಡು, ಅಲ್ಲಿಯೇ ಇರುವ ಉತ್ತರಗಳನ್ನು ಹುಡುಕಿ ಬರೆಯುವ ಕೌಶಲ್ಯವನ್ನು ಮೈಗೂಡಿಸಿಕೊಳ್ಳಿ.
ಕೊನೆಯದಾಗಿ, ಪರೀಕ್ಷೆಯ ಹಿಂದಿನ ದಿನ ರಾತ್ರಿ ಅತಿಯಾಗಿ ನಿದ್ದೆಗೆಟ್ಟು ಓದಬೇಡಿ. ಚೆನ್ನಾಗಿ ನಿದ್ದೆ ಮಾಡಿ, ಬೆಳಿಗ್ಗೆ ತಾಜಾ ಮನಸ್ಸಿನಿಂದ ಪರೀಕ್ಷಾ ಕೇಂದ್ರಕ್ಕೆ ತೆರಳಿ. ಯಾವುದೇ ಆತಂಕವಿಲ್ಲದೆ ಧೈರ್ಯದಿಂದ ಪರೀಕ್ಷೆ ಎದುರಿಸಿ. ನಾಳಿನ ಪರೀಕ್ಷೆಗೆ ಎಲ್ಲರಿಗೂ ಶುಭವಾಗಲಿ
Disclaimer: This content was automatically imported from a third-party source via RSS feed. The original source is: https://kannada.oneindia.com/news/karnataka/karnataka-sslc-kannada-board-exam-2026-last-minute-paper-revision-tips-and-important-topics-guide-447383.html. xn--babytilbehr-pgb.com does not claim ownership of this content. All rights remain with the original publisher.
