Karnataka
-Pragathi S
ದಾವಣಗೆರೆ: ಕುಡಿತದ ಚಟ ಮನುಷ್ಯನನ್ನು ಎಷ್ಟರಮಟ್ಟಿಗೆ ಅಮಾನವೀಯನನ್ನಾಗಿ ಮಾಡುತ್ತದೆ ಹಾಗೂ ಸ್ವಂತ ಮಕ್ಕಳ ಭವಿಷ್ಯಕ್ಕೇ ಕೊಳ್ಳಿ ಇಡುವಂತೆ ಮಾಡುತ್ತದೆ ಎಂಬುದಕ್ಕೆ ದಾವಣಗೆರೆ ಜಿಲ್ಲೆಯ ನ್ಯಾಮತಿ ತಾಲೂಕಿನಲ್ಲಿ ನಡೆದ ಈ ಹೃದಯವಿದ್ರಾವಕ ಘಟನೆಯೇ ತಾಜಾ ಉದಾಹರಣೆಯಾಗಿದೆ. ಮದ್ಯವ್ಯಸನಿಯಾದ ತಂದೆಯೊಬ್ಬ, ಹತ್ತನೇ ತರಗತಿಯಲ್ಲಿ (ಎಸ್ಎಸ್ಎಲ್ಸಿ) ಓದುತ್ತಿರುವ ತನ್ನ ಸ್ವಂತ ಮಗಳ ಶಾಲಾ ಪುಸ್ತಕಗಳನ್ನು ಬೆಂಕಿಗೆ ಹಾಕಿ ಸುಟ್ಟು ಹಾಕಿರುವ ಅಮಾನವೀಯ ಘಟನೆ ಬೆಳಕಿಗೆ ಬಂದಿದೆ. ಆದರೆ, ಆಕೆಯ ನೆರವಿಗೆ ತಕ್ಷಣವೇ ಧಾವಿಸಿದ ಪೊಲೀಸ್ ಹೆಲ್ಪ್ಲೈನ್ 112ರ ಸಿಬ್ಬಂದಿ, ಬಾಲಕಿಗೆ ಹೊಸ ಪುಸ್ತಕಗಳನ್ನು ಕೊಡಿಸುವ ಮೂಲಕ ಆಕೆಯ ವಿದ್ಯಾಭ್ಯಾಸಕ್ಕೆ ಆಸರೆಯಾಗಿ ಪೊಲೀಸ್ ಇಲಾಖೆಯ ಮಾನವೀಯ ಮುಖವನ್ನು ಅನಾವರಣಗೊಳಿಸಿದ್ದಾರೆ.
ಘಟನೆಯ ಹಿನ್ನೆಲೆ
ನ್ಯಾಮತಿ ಪೊಲೀಸ್ ಠಾಣೆ ವ್ಯಾಪ್ತಿಯ ಅರುಂಡಿ ಗ್ರಾಮದ ನಿವಾಸಿಗಳಾದ ಚಂದ್ರಮ್ಮ ಮತ್ತು ಚಿಕ್ಕಪ್ಪ ದಂಪತಿಯ ಪುತ್ರಿ ತೇಜಸ್ವಿನಿ ಈ ದೌರ್ಜನ್ಯಕ್ಕೆ ಒಳಗಾದ ವಿದ್ಯಾರ್ಥಿನಿ. ಈಕೆ ಸಮೀಪದ ಕೆಂಚಿಕೊಪ್ಪ ಪ್ರೌಢಶಾಲೆಯಲ್ಲಿ 10ನೇ ತರಗತಿ ವ್ಯಾಸಂಗ ಮಾಡುತ್ತಿದ್ದಾಳೆ. ತೇಜಸ್ವಿನಿ ಓದಿನಲ್ಲಿ ಮುಂದಿರುವ ಪ್ರತಿಭಾವಂತ ವಿದ್ಯಾರ್ಥಿನಿ ಎಂದು ಶಾಲೆಯ ಶಿಕ್ಷಕರೂ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆದರೆ, ಆಕೆಯ ತಂದೆ ಚಿಕ್ಕಪ್ಪ ತೀವ್ರ ಮದ್ಯವ್ಯಸನಿಯಾಗಿದ್ದು, ನಿತ್ಯವೂ ಕುಡಿದು ಬಂದು ಮನೆಯಲ್ಲಿ ಹೆಂಡತಿ ಮತ್ತು ಮಗಳ ಜೊತೆ ಗಲಾಟೆ ಮಾಡುತ್ತಿದ್ದನು.
ಅದೇ ರೀತಿ ಇತ್ತೀಚೆಗೆ ಸಂಪೂರ್ಣ ಮದ್ಯದ ಮತ್ತಿನಲ್ಲಿ ಮನೆಗೆ ಬಂದಾತ, ಏಕಾಏಕಿ ಓದುತ್ತಿದ್ದ ಮಗಳ ಮೇಲೆ ರೇಗಾಡಿದ್ದಾನೆ. “ನೀನು ಇನ್ನು ಮುಂದೆ ಶಾಲೆಗೆ ಹೋಗುವುದು ಬೇಡ, ಹೆಣ್ಣುಮಕ್ಕಳಿಗೆ ಓದಿದ್ದು ಸಾಕು, ಮನೆಯಲ್ಲಿಯೇ ಇರು” ಎಂದು ಬೆದರಿಕೆ ಹಾಕಿದ್ದಾನೆ. ಅಷ್ಟಕ್ಕೇ ಸುಮ್ಮನಾಗದ ಆತ, ಮಗಳ ಶಾಲಾ ಬ್ಯಾಗ್ ಹಾಗೂ ಮುಂಬರುವ ಎಸ್ಎಸ್ಎಲ್ಸಿ ವಾರ್ಷಿಕ ಪರೀಕ್ಷೆಗೆಂದು ಓದುತ್ತಿದ್ದ ಎಲ್ಲಾ ಪಠ್ಯಪುಸ್ತಕಗಳನ್ನು ಕಿತ್ತುಕೊಂಡು ಬೆಂಕಿಗೆ ಹಾಕಿ ಸುಟ್ಟು ಹಾಕಿದ್ದಾನೆ.
112 ಕರೆಗೆ ಪೊಲೀಸರ ತಕ್ಷಣ ಸ್ಪಂದನೆ
ತನ್ನ ಕಣ್ಣೆದುರೇ ತನ್ನ ಭವಿಷ್ಯದ ಆಸರೆಯಾಗಿದ್ದ ಪುಸ್ತಕಗಳು ಭಸ್ಮವಾಗುತ್ತಿರುವುದನ್ನು ಕಂಡು ಆ ಹೆಣ್ಣುಮಗು ಕಣ್ಣೀರಿಟ್ಟಿದ್ದಾಳೆ. ಆದರೂ ಆಕೆ ಧೈರ್ಯಗುಂದದೆ ತಕ್ಷಣವೇ ಪೊಲೀಸ್ ಹೆಲ್ಪ್ಲೈನ್ 112 (ERSS) ತುರ್ತು ಸಂಖ್ಯೆಗೆ ಕರೆ ಮಾಡಿ ತನ್ನ ಅಸಹಾಯಕತೆ ಹಾಗೂ ತಂದೆಯ ದೌರ್ಜನ್ಯದ ಬಗ್ಗೆ ಅಳಲು ತೋಡಿಕೊಂಡಿದ್ದಾಳೆ. “ನನ್ನ ಅಪ್ಪ ಕುಡಿದು ಬಂದು ಶಾಲೆಗೆ ಹೋಗಬೇಡ ಎನ್ನುತ್ತಾರೆ, ನನ್ನ ಪುಸ್ತಕ ಸುಟ್ಟು ಹಾಕಿದ್ದಾರೆ, ದಯವಿಟ್ಟು ಸಹಾಯ ಮಾಡಿ” ಎಂದು ಬೇಡಿಕೊಂಡಿದ್ದಾಳೆ.
ವಿದ್ಯಾರ್ಥಿನಿಯ ಕರೆ ಸ್ವೀಕರಿಸಿದ ಕೂಡಲೇ 112 ತುರ್ತು ಸ್ಪಂದನಾ ವಾಹನದ ಸಿಬ್ಬಂದಿಗಳಾದ ಹೇಮರಾಜ್ ಮತ್ತು ರವಿಕುಮಾರ್ ಅವರು ಸ್ವಲ್ಪವೂ ವಿಳಂಬ ಮಾಡದೆ, ಅರುಂಡಿ ಗ್ರಾಮದ ಆಕೆಯ ಮನೆಗೆ ಧಾವಿಸಿದ್ದಾರೆ. ಪೊಲೀಸರು ಮನೆಗೆ ತಲುಪುವಷ್ಟರಲ್ಲಿ ಆರೋಪಿ ತಂದೆ ಚಿಕ್ಕಪ್ಪ ತಪ್ಪು ಮಾಡಿದ ಭಯದಿಂದ ಅಲ್ಲಿಂದ ಪರಾರಿಯಾಗಿದ್ದನು. ಮನೆಯಲ್ಲಿ ಸುಟ್ಟು ಕರಕಲಾಗಿದ್ದ ಪುಸ್ತಕಗಳ ಬೂದಿ ಹಾಗೂ ಕಣ್ಣೀರಿಡುತ್ತಿದ್ದ ಬಾಲಕಿಯನ್ನು ಕಂಡು ಬಾಲಕಿಯನ್ನು ಸಮಾಧಾನಪಡಿಸಿದ ಸಿಬ್ಬಂದಿ, ಆಕೆಗೆ ಧೈರ್ಯ ತುಂಬಿದ್ದಾರೆ. ಕೇವಲ ಸಾಂತ್ವನ ಹೇಳಿ ತಮ್ಮ ಕರ್ತವ್ಯ ಮುಗಿಯಿತು ಎಂದು ಪೊಲೀಸರು ಸುಮ್ಮನಾಗಲಿಲ್ಲ. ಬದಲಾಗಿ, ತಕ್ಷಣವೇ ಪೇಟೆಗೆ ತೆರಳಿ ಸ್ವತಃ ತಾವೇ ಹಣ ಹಾಕಿ ಆಕೆಗೆ ಮುಂದಿನ ವಿದ್ಯಾಭ್ಯಾಸಕ್ಕೆ ಅತ್ಯಗತ್ಯವಿದ್ದ ಹೊಸ ಪಠ್ಯಪುಸ್ತಕಗಳು, ನೋಟ್ಬುಕ್ಗಳು, ಪೆನ್ನು ಹಾಗೂ ಇತರ ಲೇಖನ ಸಾಮಗ್ರಿಗಳನ್ನು ಖರೀದಿಸಿ ತಂದುಕೊಟ್ಟಿದ್ದಾರೆ.
ಕುಡುಕ ತಂದೆಗೆ ತಕ್ಕ ಶಾಸ್ತಿ
ಪುಸ್ತಕಗಳನ್ನು ವಿತರಿಸಿದ ಬಳಿಕ, ಗ್ರಾಮದಲ್ಲಿಯೇ ಅಡಗಿ ಕುಳಿತಿದ್ದ ತಂದೆ ಚಿಕ್ಕಪ್ಪನನ್ನು ತಾಲೂಕು ಆಡಳಿತದ ಅಧಿಕಾರಿಗಳು ಹಾಗೂ ಪೊಲೀಸರು ಪತ್ತೆಹಚ್ಚಿ, ಆತನಿಗೆ ಸರಿಯಾಗಿ ಕ್ಲಾಸ್ ತೆಗೆದುಕೊಂಡಿದ್ದಾರೆ. ಮಗಳ ಶಿಕ್ಷಣದ ಹಕ್ಕನ್ನು ಕಸಿದುಕೊಳ್ಳುವುದು ಕಾನೂನು ಪ್ರಕಾರ ಗಂಭೀರ ಅಪರಾಧ ಎಂಬುದನ್ನು ಆತನಿಗೆ ಕಟ್ಟುನಿಟ್ಟಾಗಿ ಮನದಟ್ಟು ಮಾಡಿದ್ದಾರೆ. “ಮತ್ತೊಮ್ಮೆ ಮದ್ಯಪಾನ ಮಾಡಿ ಬಂದು ಮನೆಯಲ್ಲಿ ಗಲಾಟೆ ಮಾಡಿದರೆ ಅಥವಾ ಮಗಳ ಓದಿಗೆ ಅಡ್ಡಿಪಡಿಸಿದರೆ ನಿನ್ನನ್ನು ಜೈಲಿಗೆ ಕಳುಹಿಸುತ್ತೇವೆ” ಎಂದು ಕಠಿಣ ಎಚ್ಚರಿಕೆ ನೀಡಿ, ಕಾನೂನು ರೀತಿಯಲ್ಲಿ ಬುದ್ಧಿವಾದ ಹೇಳಿದ್ದಾರೆ.
ಶಿಕ್ಷಣದ ಹಕ್ಕಿಗಾಗಿ ಸ್ವತಃ ತಂದೆಯ ವಿರುದ್ಧವೇ ಧೈರ್ಯದಿಂದ ನಿಂತ ವಿದ್ಯಾರ್ಥಿನಿ ತೇಜಸ್ವಿನಿಯ ದಿಟ್ಟ ನಡೆ ಹಾಗೂ ಆಕೆಯ ಕರೆಗೆ ಅಷ್ಟೇ ವೇಗವಾಗಿ ಸ್ಪಂದಿಸಿ, ಓದಿಗೆ ನೆರವಾದ ಪೊಲೀಸ್ ಹೆಲ್ಪ್ಲೈನ್ 112 ಸಿಬ್ಬಂದಿಯ ಕರ್ತವ್ಯಪ್ರಜ್ಞೆ ಇದೀಗ ದಾವಣಗೆರೆ ಜಿಲ್ಲೆಯಾದ್ಯಂತ ವ್ಯಾಪಕ ಪ್ರಶಂಸೆಗೆ ಪಾತ್ರವಾಗಿದೆ. ಸಾರ್ವಜನಿಕರು ಪೊಲೀಸ್ ಇಲಾಖೆಯ ಈ ಜನಸ್ನೇಹಿ ಹಾಗೂ ಅಪ್ಪಟ ಮಾನವೀಯ ಕಾರ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.
Disclaimer: This content was automatically imported from a third-party source via RSS feed. The original source is: https://kannada.oneindia.com/news/karnataka/davanagere-police-helpline-112-saves-sslc-student-s-education-after-father-burns-her-books-011-443909.html. xn--babytilbehr-pgb.com does not claim ownership of this content. All rights remain with the original publisher.
