Viral Post: ವಿಮಾನದ ಸೀಟುಗಳ ತುಂಬಾ ಕಸದ ರಾಶಿ: ಪ್ರಯಾಣಿಕರ ‘ಸಿವಿಕ್ ಸೆನ್ಸ್’ ಪ್ರಶ್ನಿಸಿದ ಮಹಿಳೆ | Viral Post women Shows Messy Flight Seats After Landing, Sparks Debate on Passenger Civic Sense

India

oi-Pragathi S

ಸಾರ್ವಜನಿಕ ಸ್ಥಳಗಳಲ್ಲಿ, ರೈಲು ಅಥವಾ ಬಸ್‌ಗಳಲ್ಲಿ ಪ್ರಯಾಣಿಸುವಾಗ ಜನರು ಕಸ ಎಸೆಯುವುದು, ಗಲೀಜು ಮಾಡುವುದನ್ನು ನಾವು ಪದೇ ಪದೇ ನೋಡುತ್ತೇವೆ ಮತ್ತು ಟೀಕಿಸುತ್ತೇವೆ. ಆದರೆ, ಸಾವಿರಾರು ರೂಪಾಯಿ ಟಿಕೆಟ್ ಕೊಟ್ಟು ವಿಮಾನದಲ್ಲಿ ಪ್ರಯಾಣಿಸುವವರ ವರ್ತನೆ ಕೂಡ ಇದಕ್ಕಿಂತ ಭಿನ್ನವಾಗಿಲ್ಲ ಎಂಬುದನ್ನು ಸಾಬೀತುಪಡಿಸುವ ಫೋಟೋವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ವಿಮಾನ ಲ್ಯಾಂಡ್ ಆದ ಬಳಿಕ ಸೀಟುಗಳ ಕೆಳಗೆ ಮತ್ತು ಸುತ್ತಮುತ್ತ ಪ್ರಯಾಣಿಕರು ಎಸೆದಿರುವ ಕಸದ ರಾಶಿಯ ಚಿತ್ರಗಳು ಇಂಟರ್ನೆಟ್‌ನಲ್ಲಿ ವೈರಲ್ ಆಗಿದ್ದು, ಜನರ ‘ಸಿವಿಕ್ ಸೆನ್ಸ್’ (ಪೌರ ಪ್ರಜ್ಞೆ) ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.

ಎಕ್ಸ್‌ನಲ್ಲಿ ಫೋಟೋ ಹಂಚಿಕೊಂಡ ಮಹಿಳೆ

ರೀತು ಜೂನ್ (Ritu Joon) ಎಂಬ ಮಹಿಳೆಯೊಬ್ಬರು ‘ಎಕ್ಸ್’ ವೇದಿಕೆಯಲ್ಲಿ ಈ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ವಿಮಾನವು ತನ್ನ ನಿಲ್ದಾಣವನ್ನು ತಲುಪಿ ಲ್ಯಾಂಡ್ ಆದ ನಂತರ ಅವರು ಈ ಚಿತ್ರಗಳನ್ನು ಕ್ಲಿಕ್ ಮಾಡಿದ್ದಾರೆ. ಫೋಟೋಗಳಲ್ಲಿ, ವಿಮಾನದ ಸೀಟುಗಳ ಮೇಲೆ, ಕೆಳಗೆ ಮತ್ತು ಪಕ್ಕದಲ್ಲಿ ಖಾಲಿ ಪೇಪರ್ ಕಪ್‌ಗಳು, ನೀರಿನ ಬಾಟಲಿಗಳು, ಸ್ನ್ಯಾಕ್ಸ್ ಕವರ್‌ಗಳು ಮತ್ತು ಟಿಶ್ಯೂ ಪೇಪರ್‌ಗಳು ಅಸ್ತವ್ಯಸ್ತವಾಗಿ ಬಿದ್ದಿರುವುದನ್ನು ಸ್ಪಷ್ಟವಾಗಿ ಕಾಣಬಹುದು.

ಈ ಚಿತ್ರಗಳ ಜೊತೆಗೆ ರೀತು ಜೂನ್ ಅವರು ಬರೆದುಕೊಂಡಿರುವ ಕ್ಯಾಪ್ಶನ್ ಅನೇಕರ ಗಮನ ಸೆಳೆದಿದೆ. “ವಿಮಾನ ಲ್ಯಾಂಡ್ ಆದ ನಂತರ ನಾನು ಈ ಚಿತ್ರಗಳನ್ನು ಕ್ಲಿಕ್ ಮಾಡಿದ್ದೇನೆ. ವಿಮಾನ ಇಳಿಯುವ ಮುನ್ನ ಗಗನಸಖಿಯರು ಪ್ರತಿಯೊಂದು ಸೀಟಿನ ಬಳಿ ಬಂದು ಕಸವನ್ನು ಸಂಗ್ರಹಿಸಿಕೊಂಡು ಹೋದರು. ಆದರೂ, ವಿಮಾನ ನಿಲ್ದಾಣ ತಲುಪಿದ ನಂತರ ಸೀಟುಗಳ ಪರಿಸ್ಥಿತಿ ಹೀಗಿತ್ತು. ನಾವು ಸಾಮಾನ್ಯವಾಗಿ ರೈಲು ಮತ್ತು ಬಸ್‌ಗಳಲ್ಲಿನ ಇಂತಹ ವರ್ತನೆಗಳ ಬಗ್ಗೆ ದೂರು ನೀಡುತ್ತೇವೆ. ಆದರೆ, ವಿಮಾನದಲ್ಲಿ ಪ್ರಯಾಣಿಸುವ ಜನರಿಗೂ ಯಾವಾಗಲೂ ಉತ್ತಮ ಸಿವಿಕ್ ಸೆನ್ಸ್ ಇರುವುದಿಲ್ಲ ಎಂಬುದನ್ನು ಇದು ಸ್ಪಷ್ಟವಾಗಿ ತೋರಿಸುತ್ತದೆ,” ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

I clicked these pictures on the flight after landing.

The air hostesses came to every seat before landing to collect waste, yet this is how the seats looked after reaching the destination.

We often complain about such behaviour in trains and buses, but this shows that even… pic.twitter.com/6iMTTlv5ex

— Ritu Joon (@ritujoon2j) March 29, 2026

ನೆಟ್ಟಿಗರ ತೀವ್ರ ಆಕ್ರೋಶ

ಈ ಪೋಸ್ಟ್ ಹಂಚಿಕೊಂಡ ಕೆಲವೇ ಗಂಟೆಗಳಲ್ಲಿ ವೈರಲ್ ಆಗಿದ್ದು, ಸಾರ್ವಜನಿಕ ಜವಾಬ್ದಾರಿ ಮತ್ತು ಜನರ ನಡವಳಿಕೆಯ ಕುರಿತು ದೊಡ್ಡ ಮಟ್ಟದ ಚರ್ಚೆಯನ್ನು ಹುಟ್ಟುಹಾಕಿದೆ. ಕಾಮೆಂಟ್ ವಿಭಾಗದಲ್ಲಿ ಅನೇಕರು ಪ್ರಯಾಣಿಕರ ಈ ಬೇಜವಾಬ್ದಾರಿತನವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ.

ಬಳಕೆದಾರರೊಬ್ಬರು ಪ್ರತಿಕ್ರಿಯಿಸುತ್ತಾ, “ಇದು ಕೇವಲ ಮೂಲಭೂತ ಸಿವಿಕ್ ಸೆನ್ಸ್‌ನ ಕೊರತೆಯಲ್ಲ, ಬದಲಾಗಿ ನಾವೇನು ಬೇಕಾದರೂ ಮಾಡಬಹುದು ಎಂಬ ಅಹಂಕಾರದ ಮನಸ್ಥಿತಿ. ಇಂತಹ ವರ್ತನೆಯನ್ನು ಸಮರ್ಥಿಸಿಕೊಳ್ಳಲು ಸಾಧ್ಯವೇ ಇಲ್ಲ,” ಎಂದು ಕಿಡಿಕಾರಿದ್ದಾರೆ. ಮತ್ತೊಬ್ಬರು ಕಾಮೆಂಟ್ ಮಾಡಿ, “ಇಂತಹ ಜನರ ಬಗ್ಗೆ ಹೇಳಲು ಒಂದೇ ಮಾತಿದೆ: ಕಾಮನ್ ಸೆನ್ಸ್ (ಸಾಮಾನ್ಯ ಜ್ಞಾನ) ಎಂಬುದು ಎಲ್ಲರಲ್ಲೂ ಸಾಮಾನ್ಯವಾಗಿ ಇರುವುದಿಲ್ಲ,” ಎಂದು ಕಟುವಾಗಿ ಟೀಕಿಸಿದ್ದಾರೆ.

ಒಟ್ಟಾರೆಯಾಗಿ, ನಾವು ಎಷ್ಟೇ ದುಬಾರಿ ವಾಹನಗಳಲ್ಲಿ ಪ್ರಯಾಣಿಸಿದರೂ, ಸಾರ್ವಜನಿಕ ಆಸ್ತಿಯನ್ನು ಗೌರವಿಸುವ ಮತ್ತು ಸ್ವಚ್ಛತೆಯನ್ನು ಕಾಪಾಡುವ ಕನಿಷ್ಠ ವಿಮಾನ ಪ್ರಯಾಣಿಕರ ಸಿವಿಕ್ ಸೆನ್ಸ್ ನಮ್ಮಲ್ಲಿ ಬೆಳೆಯುವವರೆಗೆ ಯಾವುದೇ ಬದಲಾವಣೆ ಸಾಧ್ಯವಿಲ್ಲ ಎಂಬುದನ್ನು ಈ ಘಟನೆ ಮತ್ತೊಮ್ಮೆ ಸಾಬೀತುಪಡಿಸಿದೆ.